?

Log in

No account? Create an account
Tsar-1998

September 2017

S M T W T F S
     12
3456789
10111213141516
17181920212223
24252627282930
Powered by LiveJournal.com
Tsar-1998

В НЕДЕЛЮ ПРАВОСЛАВИЯ – МОЛЕБНОЕ ПЕНИЕ

Последование молебного пения о обращении заблудших.

По скончании Литургии исходят священнослужащии от олтаря, и сотворше поклоны 3, начинают сице:
Диакон глаголет: Благослови, Владыко.
Предстоятель: Благословен Бог наш:
Лик: Аминь.
И поют: Царю Небесный:
Чтец: Трисвятое. Отче наш: Господи помилуй – 12. Приидите поклонимся:
И псалом 74: Исповемся Тебе Боже, исповемся Тебе, и призовем имя Твое:
Слава и ныне: Аллилуия, трижды.

Диакон чтет ектению обычную даже до О плавающих: и абие прилагает:
        О еже милостивым оком призрети на святую свою Церковь и соблюсти ю невредиму и непреобориму от ересей и суеверий, и миром своим оградити, господу помолимся.
        О еже утишити раздирание Ея, и силою святаго духа обратити всех отступльших к познанию истины, и сопричести ко избранному своему стаду, господу помолися.
        О еже просветити мысли неверием помраченных светом своего богоразумия, верных же своих укрепити и непоколебимых в правоверии соблюсти, господу помолимся.

Посем: Бог Господь и явися нам: глас 4.
        Благодарни суще недостойнии раби Твои, Господи, о Твоих великих благодеяниях на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: благодетелю, спасе наш, слава Тебе.
Слава, глас 3.
        Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко благодетеля и Творца славяще, вопием: слава Тебе, Боже прещедрый.
И ныне, глас 4.
        Якоже вышния тверди благолепие, и нижнюю споказал еси красоту святаго селения славы Твоея, Господи, утверди сие во век века, и приими наша в нем непрестанно приносимая Тебе моления Богородицею, всех животе и воскресение.

Диакон: Вонмем.
Предстоятель: Мир всем.
Чтец: И духови Твоему.
Диакон: Премудрость, вонмем.
Чтец: Прокимен, глас 4:
Насаждени в дому Господни во дворех Бога нашего процветут.
Стих: Возвеселится праведник о Господе и уповает на него.
Апостол к Римляном: XVI, 17-20 : Братие, молю вы, блюдитеся ...  Благодать Господа нашего Иисуса Христа с вами, аминь.
Евангелие от Матфе,зачало 75, глава 18, стих 10: Рече Господь: блюдите, да не презрите единаго от малых сих.... и елика аще разрешите на земли, будет разрешена на небесех.

Посем:
Помилуй нас Боже по велицей милости Твоей, молим Ти ся, услыши и помилуй.
По: Еще молимся о православном епископстве...:
         Не хотяй смерти грешных, но ожидай обращения и покаяния, обрати всех отступльших ко святей Твоей Церкви, молим Ти ся, милосердный Господи, услыши и помилуй.
         Устроивый мир сей в славу Твою, сотвори, да и противящиися Твоему слову обратятся, и вкупе со всеми верными, истинною верою и благочестием, Тебе Бога нашего прославят, молим Ти ся, всесильный творче, услыши и помилуй.
         Давый заповедь Твою нам, еже любити Тебе Бога нашего и ближняго своего, сотвори, да ненависти, вражды, обиды, мздоимства, клятвопреступства и прочая беззакония прекратятся, истинная же любовь да царствует в сердцах наших, молим Ти ся, спасителю наш, услыши и помилуй.
Предстоятель, возглас: Услыши ны Боже, спасителю наш:
Лик: Аминь.
Диакон: Господу помолимся.
Лик: Господи помилуй.

Молитва:
Всевышний Боже, Владыко и содетелю всея твари, наполняяй вся величеством Твоим и содержай силою Твоею! Тебе вседаровитому Господу нашему мы недостойнии благодарение приносим, яко не отвращаешися нас беззаконий ради наших, но паче предваряеши ны щедротами Твоими. Ты ко избавлению нашему послал еси единороднаго Твоего Сына, и благовестил безмерное Твое к роду человеческому снизхождение: яко хотением хощеши, и ожидаеши, еже обратитися нам к Тебе и спасеным быти: Ты, снизходя к немощи нашего естества, укрепляеши нас всесильною святаго Твоего духа Благостию, утешаеши спасительною верою и совершенною надеждою вечных благ, и руководствуя избранных Твоих в горний сион, соблюдаеши яко зеницу ока. Исповедуем, Господи, великое Твое и безприкладное человеколюбие и милосердие. Но видяще многих поползновения, прилежно Тя, всеблагий Господи, молим: призри на Церковь Твою, и виждь, яко Твое спасительное благовестие аще и радостно прияхом, но терние суеты и страстей творит оное в некиих малоплодно, в некиих же и безплодно, и по умножению беззаконий овии ересьми, овии расколом противящеся евангельской Твоей истине, отступают от достояния Твоего, отревают Твою благодать и повергают себе суду Твоего пресвятаго слова. Премилосердный и всесильный, не до конца гневаяйся Господи! Буди милостив, молит Тя Твоя Церковь, представляющи Тебе начальника и совершителя спасения нашего Иисуса Христа, буди милостив нам, укрепи нас в правоверии силою Твоею, заблуждающым же просвети разумныя очи светом Твоим Божественным, да уразумеют Твою истину: умягчи их ожесточение и отверзи слухи, да познают глас Твой и обратятся к Тебе Спасителю нашему. Исправи, Господи, иных развращение и жизнь несогласную христианскому благочестию: сотвори, да вси свято и непорочно поживем, и тако спасительная вера укоренится и плодоносна в сердцах наших пребудет. Не отврати лица Твоего от нас, Господи, воздаждь нам радость спасения Твоего: подаждь, Господи, и пастырем Церкве Твоея святую ревность, и попечение их о спасении и обращении заблуждающих духом евангельским раствори: да тако вси руководими достигнем, идеже совершение веры, исполнение надежды и истинная любовь: и тамо с лики честнейших небесных сил прославим Тебе Господа нашего, Отца и Сына и Святаго Духа, во веки веков. Аминь
Таже возглашает: Слава Тебе Богу, благодетелю нашему, во веки веков.
Лик: Аминь.
И абие лик поет песнь святаго Амвросия, или вместо: Славословие великое.
Диакон: Премудрость.
Лик: Честнейшую херувим:
Таже бывает обычный отпуст.
 

Comments